[10 gusht 2025]
Këshilli i Sigurimit i OKB-së thirri një seancë urgjente për të dielën për të diskutuar qëllimet e Izraelit për të pushtuar qytetin e Gazës, raporton dpa.
Plani, i cili u miratua nga kabineti i sigurisë i Izraelit të premten, ka shkaktuar zemërim ndërkombëtar. Sekretari i Përgjithshëm i OKB-së, Antonio Guterres, e quajti atë një “përshkallëzim të rrezikshëm” në luftën 22-mujore në Rripin e Gazës. Anëtarët evropianë të Këshillit të Sigurimit – Danimarka, Franca, Greqia, Mbretëria e Bashkuar dhe Sllovenia – kërkuan një takim urgjent në Nju Jork.
Sipas një Raporti të pavarur të Këshillit të Sigurimit, të gjithë anëtarët e Këshillit të Sigurimit përveç Shteteve të Bashkuara e mbështetën propozimin.
Gjatë seancës, e cila fillon në orën 16:00, shtetet anëtare do të shkëmbejnë mendime dhe raportuesit e OKB-së pritet të paraqesin pasojat e mundshme të pushtimit të kryeqytetit të Gazës.
Reagimet ndërkombëtare
Pas vendimit të Izraelit, Gjermania, Mbretëria e Bashkuar, Italia, Zelanda e Re dhe Australia hodhën poshtë së bashku planet për të marrë kontrollin e Qytetit të Gazës.
Në një deklaratë nga ministritë e tyre të jashtme, ato paralajmëruan se ofensiva do të përkeqësonte krizën humanitare, do të rrezikonte jetën e pengjeve dhe mund të rezultonte në zhvendosje masive të civilëve.
Ata thanë se zgjidhja me dy shtete mbetet e vetmja rrugë për paqe të qëndrueshme midis izraelitëve dhe palestinezëve. Kancelari gjerman Friedrich Merz gjithashtu ndaloi eksportin e pajisjeve ushtarake në Izrael që mund të përdoren në Gaza. [GN/ISHGJ]
