Nga Mark RUPA
Sot, 30 ditë në kambë.
Një besë e mbajtun, një zâ qytetar dhe një qëndresë që nuk mund të thyhet.
Mrekullia e parë është se shpresa mori kambë dhe doli në shesh. Njerëzit u bashkuan pa dallim, pa urdhën e pa flamur partie.
Mrekullia e dytë është se një kauzë që nisi për natyrën, u ba kushtrim kombëtar për dinjitet, transparencë dhe të ardhmen e vendit.
Mrekullia e tretë është se debati publik u zhvesh nga mjegulla. U pa më qartë kush e mbron interesin publik, kush hesht dhe kush përpiqet me e zvogëlue zanin qytetar.
Mrekullia e katërt është se natyra po mbrohet si shtëpi e përbashkët e të gjithë shqiptarëve. Jo si plaçkë tregu, por si amanet dhe detyrim për brezat që vijnë.
Mrekullia e pestë është se propaganda nuk ia doli me e fikë. Sa më shumë u vu në provë kjo protestë, aq më shumë tregoi forcën e saj: të qetë, qytetare dhe këmbëngulëse.
Mrekullia e gjashtë është se zani i protestës kaloi kufijtë. Kauza u ndërkombëtarizua dhe sot mund të jetë frymëzim edhe për shoqnitë ma të emancipueme. Institucionalisht, Europa po kërkon më shumë përgjegjësi, transparencë dhe respekt për të drejtën e pronës, për natyrën dhe për zonat e mbrojtura.
Mrekullia e shtatë është ndoshta ma e bukura: shqiptarët po japin shembull qytetarie.
30 ditë pa dhunë, pa djegie, pa thyerje, pa hunj e pa gaz lotsjellës. Vetëm zâ, qëndresë dhe dinjitet.
Kur e kërkon të drejtën me të drejtë, nuk je kurrë i humbur.
Respekt për ata që prej 30 ditësh janë në ballë të protestës.
Respekt për ambientalistët, organizatat e shoqërisë civile, të rinjtë model dhe çdo qytetar që ka qëndrue me dinjitet.
30 ditë qëndresë. 30 ditë dinjitet. 30 ditë qytetari. 
